Боздошти қиморбозон дар наздикии бозори “Корвон”
Барои ин кор онҳо қаблан низ боздошту лекин боз ба фиреби мардум идома додаанд.
Сурат: dushanbepolice.tjСокинони шаҳри Кӯлоб Самандар Юнусови 25-сола ва ноҳияи Фархор Хуршед Ҳамидови 26-сола аз ҷониби кормандони милитсия барои ташкилии бозии қиморбозӣ дар кӯчаҳо боздошт шуданд.
Бино ба иттилои маркази матбуоти Раёсати ВКД дар шаҳри Душанбе, номбурдагон ҳангоми дар кӯчаи Муҳаммадҷон Қосимови ноҳияи Фирдавсӣ, наздикии бозори “Корвон” ба бозии ба истилоҳ «алик-малик» машғул шудан дастгир гардиданд.
“Зимни пурсиш муайян карда шуд, ки гарчанде онҳо қаблан чандин маротиба аз ҷониби кормандони мақомот дастгир ва барои ин кирдори ғайриқонунӣ нисбаташон чораҳои дахлдори қонунӣ андешида шуда бошад ҳам тарки ин амали ғайриқонунӣ накарда, баръакс дар назди худ шаҳрвандони зиёдеро ҷамъ намуда, ба бозии «алик-малик» машғул ва бо ин роҳ маблағ ба даст меоварданд”, - омадааст дар маълумоти Раёсат.
Зикр мегардад, ки вобаста ба ин нисбати номбурдагон протоколи маъмурӣ тартиб дода шуда, бо ҳукми Суд нисбати ҳар кадоме ҷазо дар намуди ҳабси маъмурӣ ба муҳлати 7-шабонарӯзӣ таъин карда шуд.
