Тавре ки як манбаъ аз ФФТ хабар дод, технологияи нав, ки дар бисёре аз кишварҳои ҷаҳон муваффақона истифода мешавад, футболи миллиро поку шаффофтар намуда, ба доварон дар қабули қарори дуруст кумак мекунад.

Лекин барои оғози ҷорисозии ин технология, як қатор шартҳоро мебояд иҷро намуд, аз ҷумла таҳияи ҳуҷҷатҳо, ба омӯзиш фаро гирифтани доварон ва ташкил кардани давраҳои омӯзиши махсус барои онҳо.

Ба гуфтаи мутахассиси ФФТ, агар ҷорисозии низоми VAR ҳамин сол оғоз гардад, дар мавсими оянда аллакай метавон такрорҳои видеоро дар бозиҳои чемпионати Тоҷикистон тамошо кардаву лаҳзаҳоро санҷид.Зимнан зикр шуд, ки айни замон ФФТ бо як қатор ширкатҳои таҳвилгари техникаву таҷҳизот гуфтушунид дорад.

Гузаштан ба низоми VAR ба талаботи Федератсияи байнулмилалии ассотсиатсияҳои футбол (ФИФА) ва Конфедератсияи футболи Осиё (КФО) мувофиқат мекунад.

VAR – технологияе дар футбол аст, ки ба довар барои қабули қарор бо ёрии такрорҳо дар навори видео имкон медиҳад. Низоми ёрии видеоӣ ба тамошои чор навъи такрори лаҳзаҳои баҳсӣ имкон дода, ҷиҳати қабул қарори дуруст ба довар ёрӣ мерасонад.

Барои насби низом дар варзишгоҳҳо нархи муқарраршуда (стандартӣ) вуҷуд надорад, зеро он, аз ҷумла ба андозаи иншоот, шумораи камераҳои видеоӣ ва дигар омилҳо вобаста аст. Як модел - мавҷуд будани як ҳуҷраи мутамаркази VAR  ва модели дуюм- ғайримарказӣ, яъне вақте ки таҷҳизот ба гунаи мисол, дар мошин, вагон ё ҷойи дигар насб карда мешавад.

Бино ба маълумоти ВАО, арзиши насби низоми ба таври автоматӣ муайян кардани голҳо дар як варзишгоҳи Украина 240 ҳазор евроро ташкил додааст. Тирамоҳи соли 2017 дастаи футболи “Краснодар”-и Русия барои насби низоми VAR дар варзишгоҳи худ 208 ҳазор евро сарф кардааст.